PADAYAW

PADAYAW is also another Hiligaynon word that means to show off; like being vain and ostentatious- one would always make padayaw to  stand out and tell others, Here I am, look at me, I can show something.

 Nagpadayaw si Bulak kay Adlaw nga nagayuhom,

Nagliki-liki, nagkiay kiay, ginpakita ang kagayon,

Ginhumlad ang duag, duag nga masanag,

Yuhum-yuhom ang kalipay maaninag

Padayaw nga padayaw, gintago ang kamingaw,

Ang kasubo, ang kahidlaw sa dughan nga ginapung-aw;

Sige saot sa dupoy dupoy sang hangin nga mabugnaw;

Sige, lingaw-lingaw, ang katahum ipadayaw!

Pabay-i ang kasubo, kalimti ang panghayhay;

Tagu-a sa baul ang imo  pagmahay

Ang maskara isuksok, magkadlaw nga may kaham-ot;

Pabay-i ang mga nagatulok-tulok

Ipangilay kag mag agda sang kalipay nga bug-os.

Bata on nga kabuhi may handum nga masanag

Ang panumduman anaron sa tan aw sang sitwasyon nga may banaag

Ang kasubo sa pinsar bayluhan sang pagbinagbinag

Indi kinahanglan sa madulom ikaw ang maanad.

Ako bata sa inyo panulok apang may panan awon

Ang kapalaran sa kabuhi na sandig sa kon ano ang unod sang isip naton

Ang kadalag an ukon kalutosan ara lamang sa paminsaron

Kon kita pirmi nagakusmod kapierdihan gid lamang ang aton maangkon.

Gani…

Ipadayaw ang yuhom, matam is kag magayon

Ako lin ay, prinsesa sang tatay kag nanay nakon

Ginatulok ang kalibutan nga may maayo nga handum

Para sa masanag ka palaabuton.

Nagpadayaw si Bulak kay Adlaw nga nagayuhom,

Nagliki-liki, nagkiay kiay, ginpakita ang kagayon,

Ginhumlad ang duag, duag nga masanag,

Yuhum-yuhom ang kalipay maaninag!